اوستاد رحیم رئیسنیانین پنجشنبه گونو ۱۴۰۱/۵/۲۰ بنیاد پژوهشی شهریاردا قورولان آغیرلاما تؤرهنیندن قیسا گزارش.
تؤرهن بخارا درگیسینین رئداکتورو «علی بی دهباشینین» آپاریجیلیغی و اوستاد رئیسنیانین سئونلرینین حضوریله باشلاندی.
آپاریجی دوکتور رئیسنیانین چالیشمالاریندان و اخلاقی خصوصیتلریندن دانیشاندان سونرا دوکتور «مهری باقری» شهریارپژوهی بنیادینین رئیسینی تورهنی رسمی اولاراق آچماغا دعوت ائلهدیلر.
خانیم باقری اوستاد رئیسنیانین تانیتیمی اوزره دانیشدیلار.
ایکینجی دانیشان آقای دوکتور «باقر صدرینیا» اوستاد رئیسنیانین ۴۰_جی اون ایلیندن یازماغا باشلاماقلاریندان و همن اونایللیکده تبریزده یارانان آیدین دوشونجهلیلر قوروپونون (صمد بهرنگ، بهروز دهقانینین) اؤیهسی اولدوقلارینی و بو گونه کیمی چتین و آغیر گونلر کئچیرمهلرینه راغما یوللارینا داوام وئرمهلریندن واینامینا وفالی قالماقلاریندان دانیشدیلار.
اوچونجو دانیشمان ایسه تانیمیش صنعتکار «کیومرث کیاست» جنابلاری اولدولار. جناب کیاست آقای رئیسنیانین جیدی چالیشمالاریندان و آراشدیرمالاریندان دانیشیب، دئدیلر: “تاریخ هنر” درسین اوستاد رئیسنیانین ائتگیسینده تدریس ائتمهیه باشلاییبلار و ایللر بویو بو قونودا اوخویوب، آراشدیرمالارا ال وئریبلار.
سیراداکی دانیشان جناب «خسرو سرتیپی» اولدولار. آقای سرتیپی جناب رئیسنیانین قیمتلی کیتابخانالارینی نئجه ییقدیقلاریندان، داغچیلیغیندان، قاراداغ مئشهلرینده گئجهلرین سئیرینه چیخدیغیندان و ان اؤنملیسی اوستادین حایات یولداشینین رولوندان اوستادین حیاتیندا دانیشدیلار.
سونرا نوبت «علیمحمدی» جنابلارینا چاتدی. جناب علیمحمدی اوستاد رئیسنیا ایله بیرلیکده تألیف ائتدیکلری “سؤزلرین واحد یازیلیشی” کیتابینین و پروین اعتصامینین تؤرهنیندن اولان خاطیرهلرینی، اوستادین چالیشما سبکیندن… دانیشدیلار.
علیمحمدی جنابلاریندان سونرا دوکتور «صدیقی» جنابلاری تریبون آرخاسینا کئچیب، اؤز سئوگیلرینی هابئله اوستادلا برابر داغچیلیقدان و گزینتیلردن اولان، خاطیرالارینی و ۵۰ ایلدن چوخ یوروتدوکلری دوستلوقدان، وبوکو اوستاد رئیسنیانین دانیشیقلاریندان داورانیشلاریندان هرزامان درس آلیبلار، اوستادین دوغایا اولان وورغونلوقلاریندان، بئله کی، بیر آیلی گئجهده قاراداغ مئشهلرینده جئیرانلارین چشمهدن سو ایچمهلرینی ایزلهسین دئیه، سحرهکیمی کمینده اوتورماقلاریندان دانیشدیلار.
سونرا ایسه آپاریجی دوکتور «مشتاق مهر» جنابلارینی تریبونا چاغیردیلار. جناب «مشتاق مهر» اوستادین آراشدیرمالاریندا و یازیب، یاراتماق اوچون چالیشمالاریندا و بوکی اوستاد رئیس نیا بوگونه کیمی هئچ کیمسهدن، هئچ نووع یاردیم آلماییبلار. حتی دانشگاه اوستادلارینا و اؤیرنجیلرینه اولان یاردیملاردان دا محروم اولوب و معلیمچیلیک امک حاقیندان کیتاب آلماغا مجبور اولوبلار. آمما بو چتینلیکلر اوستادی یولوندان ائتمهییب، داهادا آرتیق چالیشمایا ماراقلانیبلار. دوکتور «مشتاقمهر» آرتیردیلار بیز هامیمیز اوستاد رئیسنیایا بورجلویوق، اونا گؤره کی، بیزیم تاریخیمیزی آراشدیریب، آیدینلاشدیریب و یازیب.
سونرا ادبیات سئونلر کانالینین ادمینی، نومایندهسی تریبونا چاغریلیر. خانیم «منافزاده» اؤز آدینا و ادبیات سئونلر آدینا بو دیرلی تؤرهنی قورانلاردان تشککور ائدیب، اوستاد رئیسنیانی تبریک ائدندن سونرا، ادبیات سئونلرین اوستاد دوکتور «رئیس نیا» جنانلارینین تؤرهنینه حصر اولونان مطلبی اوخودولار، بو یازیدا اوستادین ”آذربایجان در سیر تاریخ ایران” و “دو مبارز مشروطه”، “کوراوغلو در افسانه و تاریخ”، “اوزئیر و دو انقلاب”، “ایران و عثمانی در آستانه قرن بیستم ” کیتابلارینین اؤزللیکلریندن سوز کئچمیشدی .
خانیم منافزاده دن سونرا «علی دهباشی» اوستادین کیتابلاری حاقدا دانیشیب، دئدیلر: بوگون هرکس چاغداش تاریخی اوخوماق یاخود آراشدیرماق ایستهسه، موطلق اوستاد رئیسنیانین کیتابلارینا موراجیعت ائتمهلیدیر. وئرلیشین سونوندا آپاریجی اوستاد «رحیم رئیس نیا»نی تریبونا دعوت ائتدیلر. اوستاد قوناقلارین دواملی، صمیمی آلقیشلاریندن سونرا تؤرهنی قورانلاردان خصوصن جناب دهباشیدن، خانیم دوکتور «مهری باقری»دن، بنیاد شهریاردان تشکور ائدیب آرتیردیلار: تاریخ علمینین طلبهلری و یا تاریخ یازانلار گرک هر زامان بونو نظرده توتسونلار کی تاریخدن او زامان درس آلماق اولارکی، تاریخی دوز و حقيقت ده اولماسا، حقیقته یاخین اؤیرهنهسن. بو تؤرهن اوستاد «رحیم رئیسنیا”نین سون تألیفی اولان “دوکتورسلام الله جاویدین خاطیرهلری” کیتابینی علی دهباشی جنابلارینا سونوب، قوناقلاردان، دانیشانلاردان تشککور ائتمکله بیتدی.
تاسوفلریله یئرین داریشلیغینا گؤره قوناقلارین چوخو سالوندا، حتتا پیللهلرده آیاق اوسته قالدیلار…
دسته بندی شده در ادبی خبرلر