آرزولار بیتن دئییل! / کریم گول اندام

آرزولار بیتن دئییل!

مین یئرده قوناق قالسان ،

مین قوناق یولا سالسان

مین دوستونا ال توتوب

مین دوشماندان اؤج آلسان

ان چتین یاریشلاردا ،

كسكين غلبه چالسان

قیزلارینلا فخر ائدیب ،

اوغول دئییب اوجالسان

غیرت ایله یاشاییب

حؤرمت ايله قوجالسان

یئنه ده دویاجاقسان

بوحیاتین سئوداسی

باشیندان اؤتن دئییل

آرزولار بيتن دئییل !

دونیانین دؤرد بوجاغين

دولاناسان، دؤنه سن

اولدوزلارا باش چکیب،

یئر اوزونه ائنه سن !

قوجالیب الدن دوشوب

گنج اولاسان یئنه سن !

یئنی دن آرزولارین

قانادینا مینه سن !

اؤيرنمه دیکلر ینی ،

تزه دن اؤيره نه سن

يئنه ده آناجاقسان،

بو حياتين هوسی ،

کؤنلوندن ایتن دئییل !

آرزولاربیتن دئیییل !

بوحیاتدیر سئوگیلیم

ایکی نفس آراسی

اولوم دا وار اؤلوم ده

يوخدور بونون چاراسی!

سارسيدان آجيلارين

تاپیلماسا داواسی

آغير ايشكنجه لرين

بیتمه سه ده یاراسی

عؤمورلوك دوستاقلارين

اولماسا قورتاراسي

نه قدر چرخ فلک

ممکون دئییل دوراسی

یئنه ده اینسان اوغلو

حیاتدان کوسن دئییل

آرزولار بیتن دئییل

دونیانین ان باهالی

اطلسینی گئیه سن

طاووس اتی قوش سودو

ایسته ديگین یئیه سن

سئوگیلی دوستلارینلا

دئییب ،چالیب ،گوله سن

فيرلانان چرخ فلک

مرادینجا گؤرونسه

سعادت بیر قوش کیمی

اوچوب چی نینه ائنسه

بیر ده ایناناجاقسان

"غربت جنته دؤنسه"

یئنه ده وطن دئییل!

آرزولاربيتن دئییل!

فروردین آیی-۱۴۰۳-نجو ایل

اورمو-کریم گول اندام