آشیقلار بایرامی – مییانا

دؤردونجو آشیقلار بایرامی فروردین آیی نین 30دا مییانا شهرینده قورولدو. کئچن ایللرده بو مراسیم مردمی ییغینجاق ساییلاراق ائولرده قورولوردو، آنجاق بو ایل فرهنگ و ارشاد اداره سی طرفیندن مییانانین فرهنگسرا سالونو بو مراسیمه اختصاص وئریلدی و باشقا اداره لر ده اونونلا همکارلیق ائتدیلر. بونا گؤره طنطنه لی بیر مراسیم کئچیریلدی. بو بایرام مراسیمینی ترتیب ائده ن وهامیدان آرتیق چالیشان آشیق عباس ستاری اولموشدور اما اونلارجا مییانالی شاعیر، یازار و ادیب اونون آرخاسیندا دایانیب و بیرگه ایشله میشدیلر.

   قورولتارا قوشولان آشیقلار مییانادان علاوه آذربایجانین مختلف شهرلریندن ده گلمیشدیلر. مراسیم قرآن تلاوتی و اسلامی ایران جمهوروسونون ملی سرودو اوخوناندان سونرا 20دن آرتیق آشیق صحنه یه گلیب بیرگه کُر دسته سی اولاراق سس – سسه وئریب ماهنی اوخودولار. سونرا مییانانین بؤیوک صنتکاری و شهرین قوجامان هنرمندی "آقای مهدی بهجتی جنابلاری" قوناقلارا "خوش گلدین" دئییب، قورولتایی قورانلاردان دا منتدارلیغینی بیلدیردی. سونرا آذربایجانین دده آشیغی اولان دونیا اؤدوللرینی قازانان خرمدره لی "آشیق گلابعلی داوودبیگی" گؤزل سسی و سازی ایله مجلیسی ذووقا گتیردی. آشیغی مشایعت ائده بالابانچی مهدی خدابنده اولموشدور.

   اوستاد آشیقلاریمیزدان اولان و 15 جیلد شعر دفتری یازان و تبریزدن گلن "آشیق غفار ایراهیمی" اؤز سازی و سؤزونو ایفا ائتدی.

"آشیق گول احمد رستمی" تبریزدن گؤزل ماهنی لاریلا شنلیک یاراتدی.

سونرا دکتر "م. کریمی" آشیق ادبیاتی و موسیقی سی حاققیندا دانیشدی. اونون دانیشیغی نین بورادا اوخویاجاقسانیز.

اهردن گلن "آشیق اومود چناری" صحنه یه گلدی. اونو بالابانلا مشایعت ائده ن احمد عبداللهی اولدو.

"آشیق علی پیچ کانلو" مییانادان مراسیمه قاتیلیب اؤز موسیقی سینی اجرا ائتدی. اونونلا برابر "اسماعیل توکلی" قاوال ایله اشتراک ائتدی.

"آشیق امیر محمدی" تبریزدن گله رک گؤزل سسی و ایفاسی ایله مجلیسه یئنی بیر طراوت باغیشلادی.

"آشیق حسن مهدی پور" و "آشیق حسین نجفی فرد" تبریز آشیقلاریندان بیرگه صحنه یه چیخیب گؤزل ایفالارینی اجرا ائتدیلر.

"آشیق یزدان عبدالهی" گؤزل ماهنی لاری ایفا ائتدی و اونو بالابان ایله مشایعت ائده ن "کاووسی" جنابلاری اولدو.

"آشیق احمد قیشلاقی" تبریزدن اؤز وئرلیشینی اجرا ائتدی. آشیق قشلاقی عئینی حالدا سازبند اوستادلاردان تانینیر.

"آشیق رضا رضایی" سونراکی ایفاچی آشیق صحنه یه گلدی.

"آشیق ابوالفضل صفرزاده" اهردن اؤز ایفاسینی اجرا ائتدی.

"آشیق عباس ستاری" مییانانین اوستاد آشیقلاریندان و بو مراسیم اوچون زحمتلره قاتلانان ، هابئله شاعر و بسته کار آشیغیمیز اؤز ایفاسینا گؤره سِن اوستونه چیخیر و یئنی بسله دیگی هاوانی – "قافلانتی هاواسی" آدلاندیراراق ایفا ائتدی و بوتون تاماشاچیلار و آشیقلار طرفیندن آلقیشلاندی.

"آشیق فرمان خانی" اهر آشیقلاریندان چیخیش ائدیب و "بهمن محیطی" ده اونو قاوال ایله مشایعت ائتدی.

"آشیق میلاد بابائی" مییانا آشیقلاریندان اؤز برنامه سینی تاماشایا قویدو.

"آشیق حمزه خدری" مییانا آشیقلاریندا سازیلا ماهنی لار اوخودو.

"آشیق اسرافیل عبدالهی" یئنه مییانا آشیقلاریندان سن اوستونه چیخیب برنامه سینی اجرا ائتدی.

خالخالدان گلن "آشیق محیطی" قارداشی ایله بیرگه گؤزل ماهنیلار اوخودولار و خالخال شکسته سینی ده تاماشاچیلارین ایسته یی اساسیندا اجرا ائتدیلر.

"آشیق حسن مهدی پور" یئنه صحنه ده اؤز صنتی نی گؤستردی.

مییانا آشیقلاریندا "بیژن داوودی" و سونرا "آشیق اومود جباری" گؤزل ایفالار ائدیب و وئرلیشین سونوندا آشیقلاردان تقدیر اولوندو. بو مراسیم ساعات 50/15 دا باشلاییب ساعات 20ده سونا چاتدی و تاماشاچیلار گؤزل بیر خاطیره ایله ائولرینه دؤندولر. بو گؤزل مراسیمین آپاریجیسی مییانانین چوجلو شاعیری "تایماز مییانالی" – درهمجانی جنابلاری اولموشدور.

گؤزل و اوره یی اوخشایان صحنه لر بو مراسیمده چوخ اولدو، آنجاق قورولتایا قاتیلان بیر چوخلو صنتکارلار، فیلم، تئاتر، خطاطلیق و باشقا صنعتلرین ده یرلی صنعتکارلاری، دانشگاه اوستادلاری، مییانا شهری نین موسیقی و آشیقلیق هوسکارلاری، اؤزه للیکله شهرین گؤزل و گوجلو شاعیرلری آقالار: ارشد نظری، حسین رزمی، دومان بختیاری، یوسف جوادی و باشقالاری مجلیسه داها گؤزللیک وئرمیشدی. موسیقی هوسکارلاری اولان شهرین گنج و غیرتلی شاعیرلری اؤز تلاشلاریلا مجلیسین داها انتظاملی و گؤزل چیخیشینا یاردیمچی اولموشدولار. ایشالله گلن ایللر و گلن برنامه لر بوندا داها گؤزل و آردیجیل داوام تاپسین.