12جی آشیقلار بایرامی زنگاندا قورولدو

آشیقلار ادبیاتی و موسیقی سی اؤز درینلیگی و زنگینلیگی ایله خالقیمیز آراسیندا بؤیوک بیر حؤرمته مالیکدیر. هر ایل فروردین آیی نین سونلاریندا آشیقلار زنگانا توپلانیب و بایرام ائدیرلر. بو ایل ده ایرانین باشا – باشیندان اوستاد آشیقلار زنگانا قوناق گلیب و ساز – سؤزلریله بو شنلیک مراسیمینه قاتیلدیلار. آنجاق بو ایل عزیز آذربایجانیمیزدا طبیعت شیلتاغیندان سئللر یولا دوشموش و وطنداشلاریمیزین بیر سیراسینی آپارمیش و عائیله لری یاسا اوتورتموشدور. حقیقتده آذربایجانا باش ساغلیغی وئرمه ییمیز لازیمدیر. بونا گؤره  ده بو ایل آشیقلاریمیز بو بایرامدا وام هاوالارلا خالقیمیزی قارشیلادیلار و هر آشیق میدانا چیخدیقدا، یاسلی عائیله لره تسلیت وئره رک سازلارینی دینگیلدتدیلر.

   بو وئرلیش مردمی اولاراق هر ایل ائوده قودولوردو، بو ایل ارشاد اداره سی نین همکارلیغی ایله زنگانین امام فرهنگسراسیندا اجرا اولدو و قوناقلار راحتلیقدا برنامه ده اشتراک ائتدیلر. مراسیم قرآن کریم قرائتی ایله باشلاییب، ملی سورودی ایله خالق آیاغا دوردو و اؤز سایغیسینی وطنیمیزه گؤستردی. آردیجا زنگانین قوجامان آشیغی مسلم عسگری قوناقلارا خوش گلدین دئدی و آشیقلار بایرامی باشلادی. آذربایجانین قوجامان آشیغی اورمودان گلن اوستاد آشیق دهقان ساز و سؤزو ایله گؤزل دیوانی اوخودو. سونرا زنگاندان مهدی نجفی اؤز گروهو ایله ساز – سؤزه داوام ائتدی. تبریزدن گلن اوستاد آشیقلاریمیزدان و 15 جیلددن آرتیق اثرلری یاییلان آشیق غفار ایراهیمی اؤز وئرلیشینی ایره لی آپاردی. سونرا آشیق دهقان اؤز شاگیردی آشیق الله وئردی ایله بیرگه اوخودولار. میانا آشیقلاریندان آشیق عباس ستاری بیر نئچه شعر و اوخوماسیلا مجلیسه یئنی بیر روح باغیشلادی. خرمدره دن دده آشیغیمیز ساییلان و دونیا فستیواللاریندا اؤدوللر قازانان آشیق گلابعلی داوودی سِن اوستونه چیخدی. اورمونون گؤرکملی آشیغی و اؤدوللر قازانان آشیق قوربان پور ولی اؤز هاوالاری و اوخومالاریلا مجلیسه یئنی لیک باغیشلادی. آشیق ستار خدائی زنگان آشیغی ساز و سؤزونو اجرا ائتدی و آشیق قنبر خدائی اومورنون اوستاد آشیقلاریندان اؤز وئرلیشینی اجرا ائتدی. سونرا بیر نئچه موسیقی چالیندی، او جمله دن ساری گلین ملودیسی بالاباندا چالیندی و سونرا دکتر سپهری باغلامادا ایکی ماهنی اوخودو. برنامه نی محمد رزاقی آپاریجیلیق ائتدی و ساعات 30/19 دا سونا چاتاراق قوناقلار گولر اوزله، شن اورَکله ائولرینه دؤندولر. اومود ائدیریک بو مراسیملر ایللردن اؤتدوکله داها گوجله نیب و بؤیوک سالونلاردا قورولسون و ائلیمیزین صنت و سؤزو دونیایا یاییلسین.