چاغداش آذربایجان شعری / علی اورمولو

سمندر

حیات تلاطملی دیر،

ساکیت دایانماق هئچ لیک دی

    هئچ لیک!

داش دئییلیک سوساق

حقیقته، وارینجا گؤز یومماق اؤلومدور

    اؤزوموزه گلمه لی ییک.

***

بیلمیرم هاردا، هاچان بیردن یوخا چیخدی

آردینجا چوخ گزدیم چوخ

   حتا مئییت خانالاری، ایتیردیم گونلری

یادیما گلمیر هانسی کوچه – بازاردا بیردن گؤزومه ساتاشدی

                                                               هم غریبه، هم تانیش

دئدیم سنه نه اولموش؟

تانیمیردی دینمز باخیردی، گؤزلرینده قفس شکلی . . .

علیل لر لئوینده دئدیلر بو کی بیلمبر، سن نییه هر هفته بورا گلیرسن؟

دئدیم توتاق کی بیلمیر، من کی بیلیرم

بس بو قده ر داوا – درمانلار نه . . . ؟

"مَلَک چُهره" دئدی: بیلیرسن کی، یادداشینی پوزوبلار

حَبلرینی آلیر گیزله دیر

یوخولاری تیکانلی مفتیل له موغول لاردی

                                                             نقابلی موغول لار!

هردن منه مهریبان، بعضاً پریشان اولور

بوینوندا کی ایزلری سبلیر سیلیر یورولور

                                                        تانمادیغین غریبه آدلار دئییر.

***

آغری دولور جانیما، یامانجا آغیر، درین

دویورام اود پیرلاییر گؤزوندن سمندرین . . .

                                             ع. اورمولو

                                                 7/ 4/ 95

حیات شرقیسی

دار باشیندا اوجالدی باشلاری

هرچند کی بیزه یولداش اولدو گؤز یاشلاری؛

آمما اونلار

اوخودولار اؤلمز حیات شرقیسینی حلاّج واری . . .

یاتمیشلارسا دا ایزی یوخ مزارلاردا

ناخیشلاندیلار اورک لرده

                                    آدلاندیلار دیللرده.

آلیندی یوخو یئنی عصرین اشقیالاریندان

                                                           قورخدولار آدلاریندان

آرتیردیلار کؤپکلرین سوموکلرینی یوللار باغلاندی.

ائولر قارا – قیرمیزی بایراقلاندی

                                                ماتم یاساقلاندی . . .

و بیلمه دیلر کی حیات ماهنیسی قورتاران دئییل

باش قالدیردی نرگیزلر، شقایقلر

اوخودولار حیات شرقیسینی

لاخلادیلار معتصمین تاختینی

                                       ازدیلر عظمتینی . . .

ایندی، بیر مئییت دی، مئییت!

                                           باخما ترپنمه یینه!

گل اوخویاق شقایقلرله برابر حیات شرقیسینی

هر چند کی بیزه یولداش اولوب

                                              گؤز یاشلاری

                                                           ع. اورمولو

                                                             24/1/90

کاغیذ " 2"

حکایه میزین سیرری تنهالیقدی نازنین

قوراقلیقدا یاغیش دوعاسی گره ک!

ایکی قونشو خط یوخ!

     گؤیرسین ایکی نقطه

ویصالی سئوگی بویوندا اولسون بیر آغجا قایین

                                                    محبت چیچکلنسین.

حکابه میزین سیرری دریت تنهالیق

گؤزله مه نئجه ده بوغوجو

و آنلار آغیر داریخدیریجی

                                گزه ک کی لچک لنسین!

حکایه میزین سیرری . . .

گؤرموروک بیر – بیریمیزی

دویموروق منلیییمیزی

نه سن دویورسان نه ده من

                                      حقیقتدی، دئمه یوخ!

حکایه میزین سیرری تنهالیقدی نازنین . . .

                                                     ع. اومورلو