داود اهری[1](قارانقوش)
داود خراط اهری 1338جی ایلده اهر شهرینده آنادان اولوب، اؤز شهرینده دیپلم آلاندان سونرا یوگوسلاویایا گئدیب اورادا طب اوخویور. آمما آغیر بیر خسته لیگه اوغراییب اؤز وطنینه قاییدیر و تهراندا تحصیلینه داوام ائدیر.
قارانقوس سربست شعرلرین یازاریدیر. ایندیه قده ر "یاشیل خیال"دا چوخلو شئعرلری چاپ اولوبدور. شاعیر دردلی بیر شاعیردیر. او، ملتین یوخلادیغیندان آجییر، آمما هئچ زامان بدبین دئییلدیر. چونکی بیلیر ملت اویانماسا دا دایانمیر:
بو ملت اویندی
کندینه اینانمادی
چای آخدی دا اینان آخانمادی
آمما دایانمادی. . . .! (آغیرلیق شئعریندان)
و بو گؤیرچینلرین یومولو گؤزلریندن آجینیر:
آمان – آمان
گؤزلری باغلانمیش
بیزیم گؤیرچینلر! (او گئجه لر)
شاعیر اینانیر کی انسانلارین چئوره سینه چکیلمیش حصارلار زامان کئچئیکجه ییخیلاجاقدیر. نئجه کی دئییر:
ظلمانین آخماسینا ییخیلمیش
اوچولموش اسکی حصار. (اسکی حصارلار)
شاعیرین حسرتلرینی شئعرلرینین عنوانیندان دویماق اولار: گلمه دی، آذربایجان فولکلورونا، شئعرینه ماراق گؤسته ریب و یاخشیجاسینا تانیش دیر. "گئجه رویاسی" شئعرینده اینانیر کی:
گله جکده
دنیزدن آت گله جک!
قیرآتین بئلینده
چنلی – چمنلی بئله
روشن گله جک.
من گئده رم
دایانمارام. . .
دوغرودان دا اینانمالیییق هر ایل "قارا قاشقا" ساوالانین "آت گؤلو"ندن چیخیب زامانین بابکینی هارایلار، چاغیرار، تاپمادیسا گؤله قاییدار. آمما بو زامانین بابکی کیم اولاجاق؟ آت گؤلو شاعیرلریمیزه ایلهام چاناغیدیر؟
شاعیر ناغیللار دونیاسیندا و باشقا شئعرلرینده قولکولوروموزدان یارارلاندیغینی گؤسته ریر. بونلار هامیسی بو زمانه میزین شاعیرلری اوچون قایناقدیر.
قارانقوش بیر درین دویغولو، ظریف احساسلی شاعیردیر. انسانین هر لحظهسینده بیر دویغو یارانیر؛ شاعیر بیر کیمسه دیر کی بو آنلاری آشکار ائتمه گی باجاریر. قارانقوشون بو ساحه ده اوخو بوشا گئتمیر:
یوخ داها
گؤزله مه من گول گتیرم.
اونا بیر گون گول آپاردیم
تیکانی کؤنلومو یاردی
منی داندی.
گولو آتدیم یئره
اوندان بری بیر خاطیره قالدی
داها منده نه کؤنول وار؛ -
یوخ داها
گؤزلهمه من گول گتیرم!
داود اهریدن الیمیزده اولان شئعرلر بیر کتاب حجمیجه اولار. آرزیلاییریق بونلار بو تئزلیکده بیر کتاب شکلینده چاپ اولوب یاییلا، بلکه بوتون وطنداشلاریمیز اونون شاعیرانه دویغولاریندان، دوشونجه لریندن فایدالانسینلار. شاعیر اوچون باشاریلار دیلهییب، بیر شئعرینی اوخوماغا قوناق ائدیریک:
چیلله گئجه سی
نهایت ناغیل
سونا چاتدی،
ناغیل سؤیله ین دئدی:
- "یئتیشدی یئره گئچدی.
گؤیدن اوچ آلما دوشدی
بیری منیم
بیری اؤزومون
بیریسی ده ناغیل دئیه نین!"
دئدیک: "نئجه، نئجه
بیزلره آلما یوخدور؟"
اوندایدی کی داعوا قوپدو
ناغیل سؤیله ین ده قورخدو
دئدی: - "آی اوشاقلار!
هله هارداسینیز
گلین ساداشاق
سحره جن وقت چوخدور
بو ناغیللاردان نه چوخدور!"
یئنه باشلادی:
- "بیری واریمیش
بیری یوخ ایمیش!
بیری آج ایمیش
بیری توخ ایمیش!
آلله دان دا سووای
هئچ کس یوخ ایمیش. . . .!"
[1] امید زنجان، سایی 157، 3 بهمن 75.
قیزیل قلم آذر Qizil Qelem...
ما را در سایت قیزیل قلم آذر Qizil Qelem دنبال می کنید
برچسب : نویسنده : mrbkarimia بازدید : 225 تاريخ : چهارشنبه 31 خرداد 1396 ساعت: 20:03