سنه ساری

^{سنه ساری [1]}

خوی شاعیر و یازارلاریندان بیر اثر

   بوگون آذربایجان چاغداش ادبیاتی نه دئمک ایسته­ ییر؟ نه ­یی ایزله­ ییر؟ سؤزو نه­ دیر؟ هر ادبیاتدا – هانسی دیلده اولورسا – او دیلده یازان شاعیرلر باجاریق، دوشونجه و دویغو عالمی جانلانیر. ایندی ایسه بیزیم آنادیلیمیزده یازان شاعیرلر – بو ادبیاتین اصیل معمارلاری – داها اورتا عصرلر کیمی یارین رعنا بویونا وورولوب، قاشینی کامانا، گؤزونو باداما اوخشاتماییر. یئریشینه – دوروشونا حیران قالماییر؛ ادبیاتیمیزین گلیشمه یولو انسان سئورلیک، انسانا محبت، سئوینج، انسانا حؤرمت اولموشدور.

   شاعیرلریمیزی بیر – بیر نظردن کئچیردمک اوچون، چوخ اوزاق گئتمک گره­ ک دئییلدیر. "سنه ساری" کتابی بیر شئعر توپلوسو اولاراق خوی شهری­نین چاغداش و گنج شاعیرلری­نین شعرلریندن بیر اؤرنک­دیر. بورادا اوزه چیخان شعرلرین موضوعو و شعرلرین جانلاندیغی ساحه، نظر وئرمک اوچون یئترلی­دیر. دوغرودان دا بئله شاعیرلرین اولماسیلا چاغداش ادبیاتیمیز ایره­لی گئدیر و دوزگون انکشاف یولونو تاپیر و بیز اینانیریق شعریمیز زمانلا آددیملاییر، گون موضوعلارینی آراییر، ایندی شعریمیزین اصیل موضوعو انسان سئورلیک، ائل دردینی سؤیله­ مک، ائل دیله­ یینی تصویره آلماق، انسانین ایستک و ایدئیالارینی آراشدیرماقدیر. بو شعرین اؤن پلانیندا دایانان انسان و اونون ایستک­لری، ایدئیالاری، وارلیغی و حؤرمتی­دیر. شعریمیز انسانلارا باغلی اولاراق فردی ایستک - دویغولاری یوخ، بلکه توپلومسال ایستک­لری آنلاتدیریر. آذربایجان شعری­نین قول – قانادلاری آچیلیب، یئنی سؤز دئمه­یه جان آتیر؛ ایندی شعریمیزین اؤز سازی و اؤز سؤزو واردیر. شعریمیز انسانا محبت، یوردا رغبت، ائله حؤرمت بسله ­مه ­یی باغیریر؛ بوتون بشریته اوز چئویریب اؤز وارلیغیندان مودافیعه ائده­رک انسانلاری گؤره­ للیگه، دوستلوغا، انسانلیغا چاغیریر. شعریمیز یاساقلاردان کئچیب، آیاقدان زنجیرلرینی قیریب و بوگون دونیایا سؤزونو دئمک ایسته­ییر؛ انسانلارلا قونوشور، انسانا خاطیر یاشاییر. انسانا خاطیر دیرچه­لیر و انسانا خاطیر دؤیوشور. شعریمیزین گئنیشلیگی قول – بوداغینا دقتله باخاندان سونرا جسارتله دئیه بیله­ ریک یوردوموزون و دیلیمیزین ادبیاتی قاباقجیل، دؤیوشکن و گؤزل بیر ادبیاتدیر. بو ادبیات دیلیمیزین گؤزه ­للیگیندن، ائلیمیزین آغیر و حؤرمتلی یاشاییشیندان و یوردوموزون غوغالی باشیندان تؤره ­نمه­ سینی گؤسته ­ریر؛ نه قده­ ر باشی بلالی اولورسا دا، بوگون قانداللاری سیندیریب انسانلاری باغیریر.

   سنه ساری کتابی بو ده ­یرلی و گئنیش ساحه­لی ادبیاتیمیزدان بالاجا بیر اؤرنک­دیر و نه قده ­ر ده گؤزه ­ل بیر اؤرنک! خوی شهرینده چالیشان و یارادان گنج­لریمیزین چوخونلوغونو بیله ­رک، بورادا تکجه آلتی شاعیرین شعرلری یئرله­ شیر: علی قدیم­خانی، ل. خوشبخت، یحیی صلاحلو، رسول سفیدگر شهانقی، حمید آرغیش و قارابولود.

   بو شاعیرلری یاخیندان گؤرمه ­سم ده، اثرلریله دؤنه – دؤنه تانیشام. بونلارین یارادیجیلیقلاری اؤلکه ­میزین طالعی­له باغلی اولوب، اؤزلری وطن، ائل و دیل نیسگیل­لریله تارتیشان، ائل – اویا دردینی چکن، وطن قایغیسینا قالان درین دوشونجه­لی، اینجه دویغولو و انسان سئور شاعیرلردیلر. بونلارین اثرلری وطنیمیزین هر بوجاغیندا آلیشان اوجاقلارین اودو و کؤزو اولموشدور. غزئته ­لرین تورکجه ادبی صحیفه­ لری­نین بزه­یی اولموش؛ نئجه کی امید زنجان درگی­سی­نین "گونش" ستونونو ایشیقلاندیران بو عزیزلرین یارادیجیلیقلاری اولموشدور.

   دوغرودان دا آنا دیلیمیزین ادبیاتی­نین دیرچلمه و چیچکلنمه­ سینه سبب اولان بئله – بئله گنج ­لرین همت و غیرتلری اولموشدور. وورغون دئمیشلی "هنرسیز ملتین یوردو گونش­سیز بیر قارانلیقدیر". یوردوموزو ایشیقلا دولدوران، "اودلار یوردو" عنوانینا گووه ­نن آنا وطنیمیز بو هنر صاحیب­ لری­نین همت ­لریندن آسیلی­دیر. یوز آفرین، مین آلقیش بو هنر صاحیب­لرینه!

   چاغداش ادبیاتیمیزین چئشیدلی قوللاری و قانادلاری واردیر. شاعیرلریمیزین ده بوتون ساحه ­لرده یئنی سؤزلری واردیر، آمما "سنه ساری" شعر توپلوسوندا  هامیدان آرتیق گؤز اؤنونده جانلانان ائل قایغیسی و وطن دویغوسودور. سانکی شاعیرلر وطن سئورلیگی، ائل – اوبایا محبت و سئوگی بسله ­مه ­یی، انسانا حؤرمت و سئوینج، داها دوغروسو بو ساحه­ لرده ایره ­لی سورولن گؤزل ایدئیالاری قبول ائده ­ک، اؤز یارادیجیلیقلاریندا اؤن پلانا آلمیشلار.

   باخین! شاعیر سارماشیقدان کؤرپو سالاراق سئلده ­ن کئچیر ائله ساری، وطنه ساری؛ بو جاندان کئچمه­ لر انسانلار اوغروندا­دیر. او بیری، شاعیر کیملیگی­نی سازیندان – سؤزوندن، ایزیندن و توزوندان بللی اولدوغونو ایسته­ییر. خوشبخت شاعیر، یارینی تاریخین قیزیل صحیفه­ لرینده، دردلی اوره ­یی­نین درینلیگینده، آتاسی­نین آشیقلار سؤزلرینده، وطنین کدرلی تورپاغیندا گؤروب، نیسگیل­له­نیر؛ چونکی شاعیر اؤزونو تاریخین توتغون سسی آنلاییر.

   ایندی اینانیریق کی بو گؤرکملی شاعیرلرین شعرلرینده تاریخ بویلانیر، وطن سسله­ نیر، انسان سئویلیر، گونش گیزلی اولورسا دا، سحر ایشیقلانیر.

   بو ده ­یرلی و دردلی گنج شاعیرلریمیزه بؤگون نائلیت­لر دیله­ییب گله­جه­ییمیزین گونشلی و ایشیقلی گونلری بو عزیزلرین یارادیجیلیقلاریندان آسیلی اولماغینا دریندن اینانیرام. عزیز اوخوجولاری بو شعر دفترینی اوخوماغا دعوت ائدیرم.^[2]