زنگاندا کتاب رونمایی سی

زنگاندا کتاب رونمایی سی" src="http://qizilqelem.ir/wp-content/uploads/سخنرانی-563x353.jpeg" alt="زنگاندا کتاب رونمایی سی" width="512" height="321">

   کتاب اؤنملی بیر عنصردور کی بوگونون دورومو، باهالیق و مجازی فضانین آچیقلیغی کتاب دورومونو بوروشوق بیر حالا سالمیشدیر. کتاب، داها یوخاری تیراژلارلا ساتیلمیر. آنجاق مدرن یاشاییشدان دولایی اینترنت دن دوزگون یارارلانماق لازیمسه ده، کتابی اونوتمامالی ییق. کتاب بیزیم اوچون سنددیر. بیلیرسینیز بیر سیرا مدیالار او جمله دن تلگرام کاناللاری، مدرن بیر وسیله اولاراق، هئچ بیر زمان کتابین یئرینی توتا بیلمز. اینترنت و مدرن مدیالاردان یارارلانماغی لازیم بیلیرسک، آنجاق کتابین یئرینی بوش قویمامالی ییق. باهالیق و اقتصادی دورومو نظرده توتاراق، آنجاق بایرام سنت لریمیزده بایراملیق وئرمک ده گؤزل و معنوی بیر گله نک­دیر. ایستردیم سیزلردن ایسته یم کی بو ایل بایرامدا اؤز عزیزلریمیزه، دوستلاریمیزا و ایستکلی لریمیزه بایرملیق عنوانیندا کتاب هدیه ائدک!

   هر حالدا کتاب بیزیم اوچون مقدس دیر، اؤزه للیکله دیلیمیز و ادبیاتیمیز حقینده اولان کتابلار داها مقدس ساییلمالی دیر. بوگون ایکی کتابین آچیلیش مراسیمینی تدارک گؤرموشوک. بو ایکی کتاب، "آذربایجان ادبیاتی" و "آذربایجان تورکجه سی" عنوانی آلتیندا ایکی درسلیک ماهیتی داشییان کتابلاردیرلار. بونلارین بیرینی عزیز دوستوم علی محمدبیانی جنابلاری دوزنله میشلر و ایکینجی سینی ایکی حؤرمتلی و اورتاق یاشاییش قوران ابوذر جعفری و رویا احمدی جنابلاری دوزناه میشدیرلر. هر اوچونون اللرینی برک – برک سیخیب و گول اوزلریندن اؤپه رک، اللرینیز وار اولسون دئییرم.

   مندن اؤنجه دانیشانلار بو کتابلارین حقینده گؤزل دانیشیقلاری اولدو و بیر سیرا تنقیدی باخیشلارینی دا دیله گتیردیلر. منجه، شوبهه یوخدور کی بو کتابلاردا آخساقلیقلار دا واردیر. آنجاق ایندی بو زماندا بو آخساقلیقلاری بؤیوتمک یئرینه، ایللر بویو زحمت چکیب و عشق اساسیندا بو کتابلاری یازماق اؤنملی دیر. دوغروسو بودور کی عشق اولماسایدی بئله اثرلر ده یارانمازدی. یازیچی کتابی یازیر، اؤزو چاپ هزینه لرینی اؤده ییر، اؤزو اؤز کتابینا آچیلیش تؤره نی قورور. بو بیزین دیلیمیزین مظلوملوغوندان تؤره نیر. درسلیگی یازماق اوچون ایلک اؤنجه مخاطبی تانیماق لازیمدیر، نیازلار آراشدیرماق، عنوانلاری سئچمک، سونرا مختلف آچیلاردان متن لر سئچیب و اونلارجا فنی و علمی ایشلر نظرده توتماق لازیمدیر. بورادا یازارلاریمیز بو نئچه ایشی اؤزلری تک باشینا گؤرورلر و دلیلی ده بودور کی آنادیللرینه عشق و سئوگی لری وار، اؤزلرینی آنادیلینه و ادبیاتینا بورجلو حساب ائدیرلر.  چالیشیرلار بوتون هزینه لری و زحمتلری بویونلارینا آلیب اؤز بورجلارینی یئرینه یئتیرسینلر. اونا گؤره ده بو اللر اؤپمه لی دیر.

   بو کتابلارا ایراد توتورلار کی "نیه احمد یسوی دن، قوتادغو بیلیکدن، امیرعلی شیر نوایی دن شعر و متن لر گتیرمیشلر؟ مگر بونلار آذربایجان ادبیاتینا عاییددیر؟ آذربایجانین بیر مشخص خریطه سی وار. بو چرچیوه ده ادبیات تانیتدیریلمالیدیر." یوخ دوستلار؛ منجه سیز – بو کتابلارین یازارلاری، دوزگون حرکت ائتمیشسینیز. آذربایجان تاریخ بویو اوچ دیل و اوچ ادبیاتدا اورتاق بیر دورومو اولموشدور. بیر زمانلار عرب ادبیاتی، بیر زمانلار فارس ادبیاتی و هامیدان آرتیق تورک ادبیاتی بورادا کؤک سالمیش و درین، گئنیش بیر ادبیات یارانمیشدیر. نئجه کی بیز – آذربایجان ، فارس ادبیاتیندا فارسلارلا اورتاق بیر ادبیاتا مالیک ساییلیریق، تورک ادبیاتیندا دا بیر گئنیش اورتاق ادبیاتا مالیک اولوروق. تورکلر چیندن بالکانلارا قدر یاییلدیقلاری حالدا، بیر اورتاق ادبیات بونلارین آراسیندا موجوددور. آذربایجان دا بو اورتاق تورک ادبیاتیندا بؤیوک سهم لری اولموشدور. دده قورقود، عمادالدین نسیمی، مولانا فضولی، واقف و بوگون اوستاد شهریار، دونیا تورک ادبیاتینا وئردیگی سهمی دیر. نئجه اولور شهریارین "حیدربابایا سلام" اثری بوتون تورک دونیاسیندا مدرسه لرده: قزاقستاندا، اوزبکستاندا، تورکیه ده و 18 اؤلکه ده درسی کتابلاردا اوخونور. اونا سسیمیز چیخمیر، اما دئییریک قوتادغو بیلیک، امیر علی شیر نوایی آذربایجانا نه ربطی وار؟ بیر حالداکی امیرعلی شیر نوایی ایرانین ان بؤیوک صدر اعظمی، امیر کبیری اولموش، اونون دیلی ایراندا رسمی دیل کیمی ایشلنمیش، جهانشاه حقیقی جغتایی دیلی ایله غزللر یازیبسا دا، خوی شهرینده آنادان اولموش، تبریز اونون پایتختی اولموش و بوگون ده اونون مقبره سی تبریزده دیر. نئجه اولور بونلارین دیلی و ادبیاتینی بیز آذربایجان ادبیاتیندان سایماغا اجازه میز اولماسین؟ من اؤزو تاریخ ادبیات آذربایجان سیرا کتابلاریندا – ایستر 6 جیلدلیک، 8 جیلدلیک و سونرا 12 جیلدلیک اثریمده، بیر جیلدی ائله بو اورتاق ادبیاتا یئر آچمیشام. اورتاق ادبیاتسیز، آذربایجان ادبیاتیندا دانیشماماق اولماز.

دوغرودور دوستلار، بوگون بو ایکی کتابین یاییلماسیلا، اونلارجا دوستوموز سئوینیرسه اونلارجا دوشمنیمیز آجیقلانیر. آذریها کیمی لر مانقوردلار ائله اؤز آرامیزدان چیخیرلار. هر بیر بالاجا آخساقلیغی بؤیودوب باشیمیزا وورماغا چالیشاجاقلار. ایکی ایل بوندان اؤنجه من "آنادیلی" کتابینی بوتون مجوزلریله یایماغا باشلادیم. بو کتابا زنگان استانداریندان توتوب، فرهنگ و ارشاد اداره سی، آموزش و پرورش اداره سی، همین اداره نین تحلیل محتوا بؤلومو و پژوهش سازمانی،  حتا سازمان اقوام و باشقا باشقا اورگانلار، نهادلار و سازمانلار آراشدیریب مجوزینی حاضیرلادیلار. آنجاق بیر سیرا آغزی گؤزللر و آذربایجانین حقینی یئین لر او جمله دن آذریها کیمی دوشمنلر یالان – یوغوز، تحریف و غوغاسالاری یوللاریلا بیزیم سست عنصر مسئوللاریمیزی قورخوتدولار. بوتون سندلر الده دیر. اونلار یالاندان دئدیلر آنادیلی کتابیندا سرود و مارش ملی پیشه وری قویولموش؟! بیسواد آداملار چوخدور و تاسوفله بئله حقه باز آداملارین قورخوسوندان، مسئوللار گئری قاییتدیلار. اما دئمه لی ییک آنادیلیمیزین مدرسه لرده اوخونماسی هم آنا یاسادا، هم حقوق شهروندی ده، هم حقوق بشر ده قئید اولونموش و حؤرمتلی جمهور باشقانیمیز آقای روحانی هر ایکی سئچگی ده آنا یاسانین اجرا اولونماسی و فرهنگستان زبان ترکی نین یارانماسینا قول چکمیشلر. بو، بیزیم ایلک انسانی حقوقوموزدور.

   من سوئدده گؤردوم کی 5 نفر بیر اؤلکه دن – هله مهاجر اولدوقلارینی نظرده توتاراق، بیر مدرسه ده – هر بیری بیر صنیفده اولورسا دا، دولت مؤ ظف دیر اونلارین آنادیلینده درسلیک حاضیرلاسین، اونلارا درسی کتاب یازیب یاییملاسین، معلم دن توتوب و کلاسلار قورسون. بوتون هزینه لر ده دولتین بوینونادیر. آما تاسوف یئری دیر کی ایراندا 35 میلیون تورک دیللی خالقیمیز ایلک انسانی حقلردن محرومدور.

   من سؤزو اوزاتمادان بو ایکی کتابین یازارلارینا تبریک ائدیب و امینم سونراکی چاپلاریندا اونون آخساقلیقلارینی دا رفع ائده جکلر. یئنه یازارلاریمیزین قارشیندا بو گؤزل ایشلری اوچون باش اگیب، اللرینیزه ساغلیق وئریب، داها آرتیق باشاریلار دیله ییرم.